زينبيم نهر فرات اوسته سپه داريم ئولوب

كسيلوب قوللاري غيرتلي علمداريم ئولوب

قره معجر باشووا باغلا باجي

گئت اوتور قارداشووا آغلا باجي

يارالار سينه سينون اوسته گلستان كيميدي

او قدر اوخ توخانوب جسمي نيستان كيميدي

گوزلروندن ايراق اولسون او قدر داش وورولوب

پيكري شان شان اولوب زلف پريشان كيميدي

قره معجر باشووا باغلا باجي

گئت اوتور قارداشووا آغلا باجي

داش دگوب آلنينا گل صورتينه قان توكولوب

ساحل معرفته فكر ايله مرجان توكولوب

آيريلوب عضولري قارداشيمون پيكردن

ايله بيل آيه به آيه يره قرآن توكولوب

قره معجر باشووا باغلا باجي

گئت اوتور قارداشووا آغلا باجي

باشا چيخماز بيلورم باجي بلاسي باشيمون

ئولمينجك قوروماز چشمه‌لري گوز ياشيمون

مين ائيل عمريم اگر اولسا سويا حسرت باخارام

سو كنارينده سوسوز جاني چيخوب قارداشيمون

قره معجر باشووا باغلا باجي

گئت اوتور قارداشووا آغلا باجي

لايق شاني ابوالفضليمه غم بزمي قورون

گيينوز قاره ادبلن ديزي اوسته اوتورون

آناسي ام بنينون عوضينده ملشون

سينه‌سي پارچالان قارداشيما سينه وورون

قره معجر باشووا باغلا باجي

گئت اوتور قارداشووا آغلا باجي

باشين آلديم سينمين اوسته ديديم جان قارداش

قيزلاريم گوزلروون قانينه قربان قارداش

گوردوم آهسته ديور آي گوزيمون نوري حسين

ئولورم باشيمون اوسته اوخي قرآن قارداش

قره معجر باشووا باغلا باجي

گئت اوتور قارداشووا آغلا باجي

ديديم آچ گوزلرووي وصلوه حسرت چكورم

او گوزل گوزلرووه باخماقا منت چكورم

ممكن اولسا ديدي سنده گوزووي باغلا حسين

يوزيمه باخما اليم بوشدي خجالت چكورم

قره معجر باشووا باغلا باجي

گئت اوتور قارداشووا آغلا باجي

آغليوب ياره لنن قلبيمي يارما ئولورم

گوز ياشيلان بو بياباني سووارما ئولورم

سني ويرّم قسم اللرده ئولن فاطميه

مني اكبر كيمي اخيامه آپارما ئولورم

قره معجر باشووا باغلا باجي

گئت اوتور قارداشووا آغلا باجي

قلم اولسيدي يازارديم علمون سينه سينه

سوزلريم اود توكه اهل حرمون سينه سينه

گوردي دشمن مني قولسوز باشيما وردي عمود

يوزي اوستونده يخلديم ننمون سينه سينه

قره معجر باشووا باغلا باجي

گئت اوتور قارداشووا آغلا باجي

گؤنده ر     بؤلوم لر: